ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް (އެންސީޕޯލް) އިން ކުރިއަށް ގެންދިޔަ އިންވެސްޓިގޭޝަން އޮފިސަރސް ޑިވެލޮޕްމަންޓް ޕްރޮގްރާމް ނިންމައި، ބައިވެރިންނަށް ސަނަދު ދިނުމުގެ ރަސްމިއްޔާތު ބާއްވާފިއެވެ.

އިސްކަންދަރު ބިލްޑިންގ މަލްޓިޕާޕަސް ހޯލުގައި އިއްޔެ ބޭއްވި އެ ރަސްމިއްޔާތު ޝަރަފުވެރި ކޮށްދެއްވައި ބައިވެރިންނަށް ސަނަދު ހަވާލުކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އަޙުމަދު އަބްދުލް ރަޙްމާންއެވެ. ރަސްމިއްޔާތު ޝަރަފުވެރިކޮށްދެއްވައި އަޙުމަދު އަބްދުއް ރަޙްމާން ދެއްކެވި ވާހަކަފުޅުގައި، ކޯހުން ދަސްވި ކަންކަން މަސައްކަތުގެ މައިދާނުގައި ފުރިހަމައަށް ބޭނުންކުރުމަށް އިލްތިމާސްކުރެއްވިއެވެ.

މާރިޗް 14 އިން ފެށިގެން މަސްދުވަހުގެ މުއްދަތަށް ކުރިއަށް ގެންދިޔަ އިންވެސްޓިގޭޝަން އޮފިސަރސް ޑިވެލޮޕްމަންޓް ޕްރޮގްރާމްގައި، އިންވެސްޓިގޭޝަން އޮފިސަރަކަށް ކޮންމެހެން އެނގެންޖެހޭ ބައިތައް އުނގަންނައިދީ ތަމްރީނުދީފައިވެއެވެ

އެގޮތުން، ކްރައިމް ސީން އިންވެސްޓިގޭޝަން، ލޯސް އެންޑް ރެގިއުލޭޝަންސް، އިންވެސްޓިގޭޓިވް އިންޓަވިއު އަދި އިންވެސްޓިގޭޓިވް މެނޭޖްމަންޓް ފަދަ ބައިތައް އުނގަންނައިދީފައިވެއެވެ.

އެ ޕްރޮގްރާމްގައި 30 ފުލުހުން ބައިވެރިވެ ސަނަދު ހާސިލުކޮށްފައިވާއިރު މިއީ މިފަދަ ދެ ވަނަ ޕްރޮގްރާމެވެ.