ދިވެހި ފުލުހުންގެ ޚިދުމަތުގެ ފޮރެންސިކް ސަރވިސަސް އިން ޑީއެންއޭ ޑޭ 2022 - ސްޓޫޑެންޓް އައުޓްރީޗް ޕްރޮގްރާމް ކުރިއަށް ގެންގޮސްފިއެވެ.

އިސްކަންދަރު ކޮށީގައި މިއަދު ކުރިއަަށް ގެންދިޔަ މި ޕްރޮގްރާމް ފައްޓަވައިދެއްވީ މިނިސްޓްރީ އޮފް އެޑިއުކޭޝަންގެ ސްޓޭޓް މިނިސްޓަރ ފާޠިމަތު ނަސީރުއެވެ. ދިވެހި ފުލުހުންގެ ޚިދުމަތާއި މިނިސްޓްރީ އޮފް އެޑިއުކޭޝަން ގުޅިގެން ކުރިއަށް ގެންދިޔަ މި ޕްރޮގްރާމަކީ ޑީއެންއޭ ދުވަސް ފާހަގަ ކުރުމަށް ކުރިއަށް ގެންދިޔަ މިފަދަ ފުރަތަމަ ޕްރޮގްރާމެވެ.

މާލޭގެ އެކި ސްކޫލްތަކުގެ ގްރޭޑް 7 ގެ ދަރިވަރުން ހިމެނޭހެން 150 ދަރިވަރުންނާއެކު ކުރިއަށް ގެންދިޔަ މި ޕްރޮގްރާމްގައި، ފޮރެންސިކްގެ މައުލޫމާތު ދަރިވަރުންގެ އުމުރާ ގުޅޭގޮތަށް އެކި ސްޓޯލްތަކުން ހިއްސާކޮށްފައިވެއެވެ.

އަދި ދިވެހި ފުލުހުންގެ ޚިދުމަތުގެ ޑީއެންއޭ ލެބޯޓްރީއާއި ޑީއެންއޭއާ ގުޅޭ މައުލޫމާތާ އަދި އެ ލެބޯޓްރީން ކޮށްފައިވާ އެކި މަސައްކަތްތަކުގެ މައުލޫމާތު ހިއްސާކޮށްފައިވެއެވެ. އަދި ޕްރޮގްރާމްގައި ބައިވެރިވި ކޮންމެ ދަރިވަރަަކަށް ހަނދާނީ ލިޔުން ދީފައިވެއެވެ

ޑީއެންއޭ ދުވަހަކީ އެޕްރީލް މަހުގެ 25 ވަނަ ދުވަހެވެ. ޑީއެންއޭ ދުވަސް ފާހަގަކުރުމަށް ކޮންމެ އަހަރެއްގެވެސް އެޕްރީލް މަހު 25 ވަނަ ދުވަހު ތަފާތު އެކި ހަރަކާތްތައް ކުރިއަށް އޮތް ތަނުގައިވެސް ކުރިއަށް ގެންދިއުމަށް ދިވެހި ފުލުހުންގެ ޚިދުމަތުންވަނީ ނިންމާފައެވެ.