މި އަހަރުގެ މާރިޗު މަހުން ފެށިގެން މި އޮގަސްޓު މަހުގެ މިހާތަނަށް ގދ. އަތޮޅުގެ ބައެއް ރަށްރަށުން ފުލުހުންނަށް ހުށަހަޅާފައިވާ ވައްކަމުގެ މައްސަލަތަކާ ގުޅިގެން އޮޕަރޭޝަންތަކެއް ހިންގައި، ވަގަށްނަގާފައިވާ ތަކެތި ހޯދައިފިއެވެ.

އެގޮތުން ތިނަދޫއިން ހުށަހަޅާފައިވާ ވައްކަމުގެ މައްސަލަތަކާ ގުޅިގެން އޮޕަރޭޝަންތަކެއް ހިންގައި، ވަގަށް ނަގާފައިވާ ކަމަށް ބެލެވޭ ތަކެތި ހޯދާފައިވެއެވެ. އޭގެ ތެރޭގައި މޯބައިލް ފޯނުތަކަކާއި، ބަދިގޭގައި ހިފައި ގެންގުޅޭ ގިނަ އަދަދެއްގެ ސަމާނާއި، ކަރަންޓު ބުރުމާއަކާއި، ހަ ސެންޓުފުޅިއާއި، ސީލިންގް ލައިޓަކާ އަދި އެހެނިހެން ތަކެތި ހިމެނެއެވެ.

ގައްދޫއިން ހުށަހަޅާފައިވާ ވައްކަމުގެ މައްސަލަތަކާ ގުޅިގެން އެ ރަށުގައިވެސް ފުލުހުން ހާއްސަ އޮޕަރޭޝަންތަކެއް ހިންގާފައިވެއެވެ. އެގޮތުން، ވަގަށް ނަގާފައިވާކަމަށް ބެލެވޭ ހަތް ޓެބްލެޓާއި، ޓީވީއާއި، ލެޕްޓޮޕަކާއި، މޯބައިލް ފޯނާއި ދެ ބައިސްކަލުގެ އިތުރުން އެހެނިހެން ތަކެތި ފުލުހުން ހޯދާފައިވެއެވެ.

އަދި މި މަހު 15 ވަނަ ދުވަހު މަޑަވެލިން ހުށަހަޅާފައިވާ ވައްކަމުގެ މައްސަލައާ ގުޅިގެން ހިންގި އޮޕަރޭޝަންގައި، ވަގަށް ނަގާފައިވާކަމަށް ބެލެވޭ އައިސް ބޮކްސްއަކާއި ދެ ފްލަޑް ލައިޓް ހޯދާފައިވެއެެވެ.

އޭގެ އިތުރުން ފަރެސްމާތޮޑާއިން ހުށަހަޅާފައިވާ ވައްކަމުގެ މައްސަލަތަކާ ގުޅިގެން ހިންގި އޮޕަރޭޝަންތަކުގައި ގިނަ އަދަދެއްގެ އިލެކްޓްރޯނިކް ސާމާނު ހޯދާފައިވެއެެވެ.

މި މައްސަލަތައް ފުލުހުން ދަނީ ތަހުގީގު ކުރަމުންނެވެ.