ދިވެހި ފުލުހުންގެ ޚިދުމަތުގެ ސްޓްރެޖީޓިކް އެކްޝަން ޕްލޭންގެ ދަށުން މުވައްޒަފުންނަށް ސައިކޯ ސޯޝަލް ސަޕޯޓް ދިނުމުގެ އިންތިޒާމު ހަމަޖެއްސުމާ އަދި އެކިއެކި ކަންކަމާ ގުޅިގެން މުވައްޒަފުންނަށް ދެވޭ ކައުންސެލިންގ ފެށުމުގެކުރިން ނަފްސާނީ ދުޅަހެޔޮކަންމަތީ ތިބުމުގެ މުހިންމުކަމާ އަދި ނަފްސާނީ މައްސަލަތައް ހުންނަ މީހުން ދެނެގަތުމަށް މައުލޫމާތު ދިނުމުގެ ޕްރޮގްރާމެއް ފަށައިފިއެވެ.

ޕްރޮގްރާމް ފެށުމަށް އިސްކަންދަރު ބިލްޑިންގައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދުއެވެ. އެ ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދު، ފުލުހުންގެ އެގްޒެކެޓިވް އޮފިސަރުން އަދި ކޮމިޝަންޑު އޮފިސަރުން ބައިވެރިވެލެއްވިއެވެ.

ރަސްމިއްޔާތު ޝަރަފުވެރިކޮށްދެއްވައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި، ހުރިހާގޮތަކުން ދުޅަހެޔޮ މުވައްޒަފުންތަކެއް ބިނާކުރުމަށްޓަކައި އަދި އެކަން އެގޮތަށް ދެމެހެއްޓުމަށްޓަކައި ފުލުހުންގެ ސްޓްރެޓީޖިކް ޕްލޭންގައި ކަންތައްތަކެއް ރާވާފައިވާކަމަށް ވިދާޅުވިއެވެ. އެގޮތުން މިއަދު މިފެށޭ މަސައްކަތަކީ ވަރަށް މުހިންމު މަސައްކަތެއްކަން ފާހަގަކުރެއްވިއެވެ. އަދި މިހާރަކަށް އައިސް ފުލުހުންނާއި ފުލުހުންގެ މަސައްކަތަށް އޮންނަ ޑިމާންޑާއި ފުލުހުންގެ މަސައްކަތް ފުޅާވެ އިޖުތިމާއީ އެތައް ކަމަކަށް ފުލުހުން އެޓެންޑުކުރަންޖެހޭ ޖެހުމާ އަދި ކޮންމެ ހާލަތެއްގައި އެއީ ކުށްކުރުމާ ސީދާ ގުޅުންނެތް ކަމަކަށް ވިޔަސް އެކަންކަމާ ފުލުހުން ކުރިމަތިލުން ވަރަށް ބޮޑަށް އިތުރުވެފައިވާ ކަމަށް ވިދާޅުވިއެވެ. އަދި ކުރިއަށް އޮތް ތަނުގައިވެސް މި ކަންކަން އިތުރުވަމުން އަންނާނެ ކަމަށް ބެލެވޭ ކަމަށް ވިދާޅުވިއެވެ.

އޭގެ އިތުރުން، މުޖުތަމައުގައި ހުރި އިޖުތިމާއި ކަންކަމާއި ކުޑަކުދިންނާ ގުޅުންހުރި ކަންކަމާ އަދި އިޖުތިމާއި އެކި މައްސަލަތަކާ ގުޅިގެން ގޭބިސީތަކާއި އާއިލާތަކުގެ ތެރޭގައާއި މުޖުތަމައު ނުވަތަ ރަށެއްގައި ހުންނަ ކަންކަމާ ގުޅިގެންވެސް ފުލުހުން އެ ކަންކަމާ ކުރިމަތިލައި އެ ކަންކަމާ ޓެކުލްކުރަން އުޅޭއުޅުން އިތުރުވެގެން އަންނަ އައުމުގެ ތެރެއިން، ފުލުހުންނަށްވެސް އޭގެ ނޭދެވޭ ވަަރަށްގިނަ އަސަރުތަކެއްކުރާކަން ފާހަގަކުރެވޭ ކަމަށް ވިދާޅުވިއެވެ.

ޕްރޮގްރާމް ފެށުމުގެ ގޮތުން މިއަދު މައުލޫމާތު ދީފައިވަނީ ދިވެހި ފުލުހުންގެ ޚިދުމަތުގެ ސްޕްރިންޓެންޑެންޓް އޮފް ޕޮލިސް ރޭންކުން ފެށިގެން ދަށުގެ އޮފިސަރުންނަށެވެ. އެ ސެޝަންގައި މައުލޫމާތުދެއްވީ މިޕްސްޓަރގެ ފަރާތުން ޑރ. އާއިޝަތު އަލީ ނާޒްއެވެ.

އެގޮތުން، ނަފްސާނީ ދުޅަހެޔޮކަމާއި އެކަމުގެ މުހިންމުކަމާ އަދި ނަފްސާނީ ދުޅަހެޔޮ ކަމަށް މަސައްކަތްކުރާނެގޮތުގެ މައުލޫމާތު ހިއްސާކޮށްފައި ވެއެވެ. އޭގެ އިތުރުން، މުއައްސަސާ ތެރޭގައި ނަފްސާނީ ދުޅަހެޔޮކަމާ ގުޅޭގޮތުން އޮންނަ ސްޓިގްމާ ދެނެގަންނާނެގޮތާއި އެ ކަންކަން ނައްތާލުމަށް ކުރެވިދާނެ ކަންކަމާ ގުޅޭގޮތުން މައުލޫމާތުދީފައި ވެއެވެ.

ސިލްސިލާކޮށް ކުރިއަށް ގެންދިއުމަށް ހަމަޖެހިފައިވާ އެ ޕްރޮގްރާމްގައި، މާލެއާއި އަތޮޅުތެރެ ހިމެނޭހެން ފުލުހުންގެ ޚިދުމަތުގެ ހުރިހާ މުވައްޒަފުންނަށް މައުލޫމާތު ދިނުމަށްވަނީ ހަމަޖެހިފައެވެ.