ދިވެހި ފުލުހުންގެ ޚިދުމަތަކީ ޒަމާނާ އެއްގޮތަށް ބައްޓަން ކުރަމުން އަންނަ ޚިދުމަތެކެވެ. ފުލުހުންގެ އަމާޒަކީ ރައްޔިތުންނާ ވީހާވެސް ގާތުން ޚިދުމަތް ފޯރުކޮށް ދިނުމެވެ. މި ލަނޑުދަނޑި ހާސިލުކުރުމަށް ފުލުހުން ގެންދިޔައީ ރެއާއި ދުވާލު ކެނޑި ނޭޅި ގިނަގުނަ މަސައްކަތްތަކެއް ކުރަމުންނެވެ. މިކަމުގެ ނަތީޖާއަކަށްވީ ފުލުހުންނަށް ދެވޭ ތަމްރީންތަކުގެ ފެންވަރު ރަނގަޅުކޮށް ފުލުހުންގެ ދައުރު މުޅި ރާއްޖެއަށް މަޑުމަޑުން ފުޅާވެ ފައްކާވާން ފެށުމެވެ. މިގޮތުން 1992 ވަނަ އަހަރާ ހަމައަށް ފުލުހުންގެ ޚިދުމަތް ފޯރުކޮށްދެމުން ދިޔައީ ހަމައެކަނި މާލޭގައެވެ. އެހެންނަމަވެސް މާލެ ސަރަހައްދުގައި ވިލީ ފުލުސްތައް ގާއިމުކޮށް އަދި ހަމަ އެހެންމެ ރާއްޖޭގެ އެކި ކަންކޮޅުތަކުގައި ފުލުހުންގެ މަރުކަޒުތައް ގާއިމުކޮށް ފުލުހުންގެ ޚިދުމަތް މުޅި ރާއްޖެއަށް މިއަދު މިވަނީ ފުޅާވެގެންގޮސްފައެވެ.

މުޅިރާއްޖެއަށް ފުލުހުންގެ ޚިދުމަތް ފޯރުކޮށްދިނުމަށް އޭރު ފެށި ޕްރޮގްރާމްގެ ދަށުން ބ. އޭދަފުށި، އދ. މަހިބަދޫ، އއ. ރަސްދޫ، ޏ. ފުވައްމުލައް އަދި ހދ. ކުޅުދުއްފުށީގައި ޒަމާނީ ފެންވަރުގެ މަރުކަޒުތައް ފުރަތަމަ ފަހަރަށް ގާއިމުކުރެވި އެ ތަންތަނުގައި ފުލުހުންގެ ޚިދުމަތް ރައްޔިތުންނާ ގާތުން ފޯރުކޮށްދިނުމަށް ފެށިއެވެ.

މި ކަމުގެ ނަތީޖާއަކަށް ވެގެންދިޔައީ ދިވެހި ފުލުހުންގެ ޚިދުމަތް މަދަނީ ޚިދުމަތަކަށް ބަދަލުވުމުގެ ވިސްނުން އިހުނަށް ވުރެ ގަދަވެ އެކަމުގެ ހިޔާލުތައް ކުރެވެން ފެށުނެވެ. މިގޮތުން ދިވެހިރާއްޖޭގެ ރައީސުލް ޖުމްހޫރިއްޔާކަމުގެ މަގާމުގައި އޭރު ހުންނެވި އަލްއުސްތާޛު މައުމޫން ޢަބްދުލްޤައްޔޫމްގެ، އިސްލާހީ އެޖެންޑާގެ ދަށުން ގާނޫނާއި ގަވާއިދުތައް ތަންފީޒުކުރުމުގެ ދާއިރާ އިތުރަށް ހަރުދަނާކުރުމަށް އެޅުއްވި ފިޔަވަޅެއްގެ ގޮތުން 2004 ވަނަ އަހަރަށް ރައްޔިތުންގެ މަޖިލިސް ހުޅުވައިދެއްވުމަށް ބޭއްވި ޖަލްސާގެ ރިޔާސީ ބަޔާން އިއްވަވައި ދެއްވަމުން، ފުލުހުންނަކީ މަދަނީ ބައެއްގެ ގޮތުގައި ހަމަޖައްސަވަން ނިންމަވާފައިވާކަން އެމަނިކުފާނު އިއުލާން ކުރެއްވިއެވެ. މި ނިންމެވި ނިންމެވުމާ ގުޅިގެން، ސިފައިންނާއި ފުލުހުން ވަކި ދެ މުއައްސަސާއެއްގެ ގޮތުގައި ހަމަޖެއްސުމާ ގުޅޭގޮތުން ކުރަންޖެހޭ އެންމެހައި މަސައްކަތްތައް ދެ ފަރާތުން ގުޅިގެން ފެށިގެންދިޔައެވެ.

އެގޮތުން، 2004 ސެޕްޓެންބަރު 01 ވަނަ ދުވަހު ބޭއްވި ހާއްސަ ރަސްމިއްޔާތެއްގައި ފުލުހުންގެ ޚިދުމަތް ރައީސުލްޖުމްހޫރިއްޔާ އިފްތިތާހު ކޮށްދެއްވުމާއެކު ފުލުހުން ވަކި މުއައްސަސާއެއްގެ ގޮތުގައި ރަސްމީކޮށް އިއުލާންވެގެން ދިޔައެވެ. ހަމައެހެންމެ އެ ރަސްމިއްޔާތުގައި، ފުލުހުންގެ މައި މަރުކަޒުގައި ފުލުހުންގެ ދިދަ ނަގައި އަދި ފުލުހުން އެޅުމަށް ވަކި ހާއްސަ ޔުނީފޯމެއް ތައާރަފްކުރެވިގެން ދިޔައެވެ.

ފުލުހުންގެ ޚިދުމަތް ވަކި ޚިދުމަތެއްގެ ގޮތުގައި ބަދަލުވިކަން އާއްމުންގެ ސަމާލުކަމަށް އެންމެބޮޑަށް ފެނިގެން ދިޔައީ ފުލުހުންގެ ޔުނީފޯމާއި، ފުލުހުންގެ ދިދައާއި، ފުލުހުންގެ އުޅަނދުތަކަށް އައި ބަދަލެވެ. ނަމަވެސް އޭރު މާލެއިން ފުލުހުންނަށް ލިބިފައި ވަނީ މާލޭ ސަރަހައްދުގެ ވިލީ ފުލުސް ތަކާއި އަތޮޅުތަކުގައި ގާއިމުކޮށްފައިވާ ފަސް ޕޮލިސް ސްޓޭޝަނާއި ދޫނިދޫގެ އިތުރުން ފުލުހުންގެ މައި މަރުކަޒު ކަމުގައިވާ ޝަހީދު ހުސައިން އާދަމް ބިލްޑިންގ އެކަންޏެވެ. އެހެންކަމުން ފުލުހުންގެ މަސައްކަތަށް މާލެއިން އިތުރު އިމާރާތެއް ހޯދުމުގެ މަސައްކަތް ފެށިގެންދިޔައެވެ. މި މަސައްކަތުން ފުލުހުންގެ އުމްރާނީވެށި ރަނގަޅުކުރުމަށްޓަކައި 2005 ޖަނަވަރީ 15 ވަނަ ދުވަހު، މާލޭ މުނިސިޕަލްޓީ ތިން ނަންބަރު ކޮށީގައި ހުރި ހަ ބުރީގެ އިމާރާތް ފުލުހުންގެ އިމާރާތެއްގެ ގޮތުގައި ހަމަޖެހުނެވެ. އަދި މި ކޮއްޓަށް އިސްކަންދަރުކޮށި 01 ގެ ނަން ދެވުނެވެ. މި އިމާރާތާއެކު ފުލުހުންގެ ނިދުމާއި ކެއުމުގެ ކަންތައްތަކަށް ކޮންމެވެސް ވަރެއްގެ ލުޔެއް ލިބިގެން ދިޔައެވެ. މި ލިބުނު ކުރިއެރުމާއެކު މާލެ އާއި އަތޮޅުތެރޭގައި ހުރި މަރުކަޒުތަކުގެ މަރާމާތުގެ މަސައްކަތާއި، އައު އިމާރާތްތަކާ އަދި އެކި މައްސަލަތަކުގައި ހައްޔަރުކުރާ މީހުން ބޭތިއްބުމަށް ބޭނުންވާނެ އިމާރާތްތައް ފަރުމާކުރެވި މަސައްކަތް ފެށިގެން ދިޔައެވެ. އަދި މި މަސައްކަތުގެ ތެރެއިން 2006 ވަނަ އަހަރު ފުލުހުންގެ ވެހިކަލްތައް މަރާމާތުކޮށް ބެލެހެއްޓުމަށް ޕޮލިސް ވެހިކަލް ގަރާޖުގެ ނަމުގައި އިމާރާތެއް ލިބިފައިވާއިރު، މައްސަލަތަކުގައި ހައްޔަރުކުރާ މީހުން ބޭތިއްބުމަށް އަތޮޅުވެހި ފުލުހުންނަށް ލިބިގެން ދިޔައެވެ.

މީގެ އިތުރުން ހަމަ މި މަސައްކަތުގެ ތެރެއިން 2007 ޖަނަވަރީ 21 ވަނަ ދުވަހު އިސްކަންދަރު ކޮށީގައި 09 ބުރީގެ އިމާރާތެއް ބިނާ ކުރުމުގެ މަޝްރޫއުގެ ފެށުން ވެގެން ދިޔައީ ދިވެހި ފުލުހުންގެ މަސައްކަތަށް ލިބުނު އިތުރު ހިތްވަރަކަށެވެ. އަދި 2007 ވަނަ އަހަރު އެސްޓީއޯ 04 ނަންބަރު ކޮށި ފުލުހުންނަށް ލިބި އެކޮއްޓަށް އިސްކަންދަރު ކޮށި 02 މިނަން ދެވުނެވެ. އަދި މިކޮށީގައި ހުރި އިމަރާތްތައް އަލުން މަރާމާތުކޮށް އެ އިމާރާތުން ވެސް ފުލުހުންގެ ޚިދުމަތް ދޭން ފެށުނެވެ. މީގެ އިތުރުން ގަވާއިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯވކޮށް ބެލެހެއްޓުމަށް 2009 ފެބުރުވަރީ 01 ވަނަ ދުވަހު ޓޯޔާޑުގެ މަސައްކަތަށް ހާއްސަ އިމާރާތެއް ފުލުހުންނަށް ލިބިގެން ދިޔައެވެ. 

ކޮންމެއަކަސް، މިއަދު ދިވެހި ފުލުހުންގެ ޚިދުމަތް ޒަމާނަށް އެކަށޭނަ ޚިދުމަތެއްގެ ގޮތުގައި ބައްޓަންކޮށް، ރައްޔިތުންގެ އިތުބާރު އޮތް ޚިދުމަތަކަށް މި ޚިދުމަތް ހެދުމަށްޓަކައި، ދިވެހި ސަރުކާރުން އިސްކަމެއްދީގެން ކުރަމުން ގެންދާ މަސައްކަތުގެ ތެރެއިން ހާސިލުކުރަމުން ގެންދާ ކުރިއެރުންތަކާއި ވަމުންދާ އުމުރާނީ ތަރައްގީގެ ނަތީޖާއަކީ ފަހުގެ ތާރީހެއްގައި ރަންއަކުރުން ފަވާލެވޭނެ ފަދަ ކާމީޔާބީ ތަކެކެވެ. މި ކަމުގެ އެންމެ އަލިގަދަ އެއް ހެއްކަކީ މިއަދު މާލެ ފިޔަވައި ރާއްޖޭގެ އަތޮޅުތަކުގައި 114 ޕޮލިސް ސްޓޭޝަން ގާއިމު ކުރެވި ރައްޔިތުންނާ ގާތުން ޚިދުމަތް ދެމުންދާކަމެވެ. މީގެ ތެރޭގައި އަތޮޅު ތެރޭގައި ގާއިމުކުރެވިފައިވާ ޕޮލިސް ޕޯސްޓުތަކާއި ޕޮލިސް ޑެސްކުތައް ވެސް ހިމެނެއެވެ. އަދި ހަމައެހެންމެ އަތޮޅުތެރޭގައި ޕޮލިސް ސްޓޭޝަންތައް ނެތް ރަށްރަށާއި އަމިއްލަ ފަރާތްތަކުގެ އިމާރާތްތަކުގައި ހިންގާ ޕޮލިސް ސްޓޭޝަންތައް ފުލުހުންގެ މަރުކަޒުތަކަށް ބަދަލުކުރުމަށް ކުރެވޭ މަސައްކަތްތަކުގެ ދަށުން 61 ޕޮލިސް ފެސިލިޓީއާއި އިމާރާތް ބިނާ ކުރުމަށް އިންޑިއާގެ ކުންފުންޏެއް ކަމަށްވާ އޭބީއެލް އިންދިރާ ޕްރޮޖެކްޓްސް ޖޭވީއާ ވަނީ ހަވާލުކޮށްފައެވެ. މި މަޝްރޫއުގެ ދަށުން އަތޮޅު ތަކުގެ ރަށްރަށުގައި އިމާރާތްކުރާ 23 ޕޮލިސް ސްޓޭޝަނާއި 21 ޕޮލިސް ޕޯސްޓުގެ އިތުރުން އަތޮޅު ޕޮލިސް ސްޓޭޝަންގެ ގޮތުގައި އަށް އިމާރާތް އެޅުމަށް ހަމަޖެހިފައިވާއިރު، ދޫނިދޫގައި އިމާރާތްކުރާ ކަސްޓޯޑިއަލް ފެސިލިޓީއާއި މިހާރުވެސް ބޭނުންކުރަމުންދާ ދެ އިމާރާތެއް އުމްރާނީގޮތުން އިތުރަށް ތަރައްގީކުރުން ހިމެނެއެވެ. އަދި މާލޭގައި އިމާރާތްކުރާ ޕޮލިސް ސްޓޭޝަނަކާއި ހުޅުމާލެ ފޭސް ދޭއް ގައި އިމާރާތްކުރާ ޕޮލިސް ސްޓޭޝަނެއްގެ އިތުރުން ހަތަރު އެކޮމޮޑޭޝަން އިމާރާތް މި މަޝްރޫގެ ތެރެއިން ބިނާކުރާނެއެވެ.

ފުލުހުންގެ އުމްރާނީ ތަރައްގީއަށް މި އަހަރު އިތުރުވެގެންދިޔަ އެއް ބޮޅަކީ މާރިޗު 27 ގައި އައްޑޫ ސިޓީގައި ހުޅުވިގެންދިޔަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް (އެންސިޕޯލް) އެވެ. މީގެ އިތުރުން މާލޭގައި ފޯވިންޑް ހުރި ބިމުގައި އިމާރާތްކުރާ އިންވެސްޓިގޭޝަން އިމާރާތް އަވަސް މުސްތަގުބަލެއްގައި ހުޅުވައި، ފުލުހުންގެ ތަހުގީގީ ދާއިރާއަށް ދިމާވެފައިވާ ޖާގައިގެ ދަތިތަކަމަށް މި އިމާރާތުގެ ސަބަބުން ހައްލު ލިބި ފުލުހުންކުރާ ތަހުގީގުތަކުގެ މަސައްކަތް އިތުރަށް އަވަސްވެ ކުރިއެރުންތަކެއް ލިބިގެންދާނެ ކަމާމެދު އެއްވެސް ޝައްކެތްނެތެވެ.

ފުލުހުންގެ އުމްރާނީ ތަރައްގީއަށް ލިބިގެން މިދާ ކުރިއެރުންތަކާއެކު، ދިވެހި ފުލުހުންގެ ޚިދުމަތުގެ ދުވެލި ދުވަހެއް ދުވަހަކަށް މިދަނީ ކުރި އަރައި ފުޅާވެ އިތުރު ހަރުފަތްތަކެއް ގިރާކުރަމުންނެވެ. ފުލުހުންނަކީ ރައްޔިތުންނަށް ޚިދުމަތް ދިނުމުގައި، ދިމާވާ ކޮންމެ ހުރަހެއް ގިރާކޮށް ކޮންމެ ފަދަ ގުރުބާނީއެއް ވާން ޖެހުނުނަމަވެސް ފިސާރި ކެރިގެން ހިތްވަރާއި އަޒުމާއެކު ކުރިމަތިލާން ކެރޭ އަދި ނުގުޑާފަދަ އަޒުމެއްގެ ވެރިބައެކެވެ.

މިއަދު ފުލުހުންގެ ޚިދުމަތުގައި އަވައްޓެރި ފުލުހުން އުފައްދައި ރައްޔިތުންނާ ވީހާވެސް ގާތުން ޚިދުމަތް ދެމުންދާއިރު، ދިވެހި ފުލުހުންގެ ޚިދުމަތް މަދަނީ ޚިދުމަތެއްގެ ގޮތުގައި ދެމުންދާތާ މިއަދަށް 18 އަހަރު ފުރުނީ އެވެ. އެހެންކަމުން ދުވަހުގެ ހެޔޮއެދުމާއި ތަހުނިޔާ ލޮބުވެތި އެންމެހައި ފުލުހުންނާއި ފުލުހުންގެ އާއިލާތަކަށް އަރިސް ކުރަމެވެ.