މިނިސްޓްރީ އޮފް އެޑިއުކޭޝަނާއި ރޯޑް ސޭފްޓީ އެވެއާނަސް އެންޑް ޕްރިވެންޝަން ގުޅިގެން ސްކޫލް ދަރިވަރުންނަށް ކުރިއަށް ގެންދާ ޓްރެފިކް މޮނީޓާސް ޕްރޮގްރާމް އިމާދުއްދީން ސްކޫލް އަދި އދ. ދަނގެތީ ސްކޫލު ދަރިވަރުންނަށް ކުރިއަށް ގެންގޮސްފިއެވެ.

އެ ދެ ސްކޫލުގައި ވަކިވަކީން ކުރިއަށް ގެންދިޔަ އެ ދެ ޕްރޮގްރާމު ފުރިހަމަކުރި ދަރިވަރުންނަށް ސެޓްފިކެޓް ދިނުމުގެ ރަސްމިއްޔާތުވަނީ ބާއްވާފައެވެ. އެގޮތުން އިމާދުއްދީން ސްކޫލް ދަރިވަރުންނަށް ސެޓްފިކެޓް ދިނުމުގެ ރަސްމިއްޔާތު މި މަހު 6 ވަނަ ވަހު އެ ސްކޫލުގައި ބާއްވާފައިވާއިރު ދަނގެތީ ސްކޫލް ދަރިވަރުންނަށް ސެޓްފިކެޓް ދިނުމުގެ ރަސްމިއްޔާތު ބާއްވާފައިވަނީ މި މަހު 5 ވަނަ ދުވަހުއެވެ.

މި މަހު 1 އިން 5 އަށް އިމާދުއްދީން ސްކޫލް ދަރިވަރުންނަށް ކުރިއަށް ގެންދިޔަ ޕްރޮގްރާމްގައި އެ ސްކޫލްގެ 24 ދަރިވަރުން ބައިވެރިވިއެވެ. އަދި ސެޕްޓެމްބަރ 30 އިން އޮކްޓޯބަރ 5 އަށް ދަނގެތީ ސްކޫލް ދަރިވަރުންނަށް ކުރިއަށް ގެންދިޔަ ޕްރޮގްރާމްގައި އެ ސްކޫލްގެ 43 ދަރިވަރުން ބައިވެރިވިއެވެ.

ޓްރެފިކް މޮނީޓާސް ޕްރޮގްރާމަކީ މަގުމަތީގެ ސަމާލަތާއި ރައްކާތެރިކަމަށް ސްކޫލް ދަރިވަރުން އަހުލުވެރި ކުރުވައި އަމަލީގޮތުން މަގުމަތި ތަރުތީބުކުރުވައި މަގުމަތީގެ ސަލާމަތާއި ރައްކާތެރިކަމަށް މަސައްކަތްކުރާނެ ކުދިންތަކެއް ބިނާކުރުމަށް ހިންގާ ޕްރޮގްރާމެކެވެ.

 އެގޮތުން ދަރިވަރުންގެ އަމިއްލަ ސަލާމަތާއި ރައްކާތެރިކަން، މަގުމަތީގެ ސަލާމަތާއި ރައްކާތެރިކަން ބެލެހެއްޓުމުގައި ސަމާލުކަންދޭންވީ ކަންތައްތައް، މަގުމަތީގެ ރިވެތި އަދަބުތައް، ދިވެހި ބަހުގެ ހަމަތަކާއި އުސޫލުތަކާ އެކު މުއާމަލާތުކުރުމުގެ ހުނަރުތައް އަދި އެއްގަމު ދަތުރު ފަތުރުކުރުމުގެ ގާނުނާއި ގަވާއިދުތައް ދަރިވަރުންނަށް ދަސްކޮށްދީފައިވެއެވެ.

އޭގެ އިތުރުން، ސެލްފް ޑިފެންސް ހަރަކާތްތަކުގެ އިތުުރުން ޓްރެފިކް ބެލެހެއްޓުމުގައި އަމަލުކުރަންވީ ގޮތްތައް ދަސްކޮށްދިނުމަށް މަގުމަތީގައި އަމަލީ ހަރަކާތްތައް ކުރިއަށް ގެންގޮސްފައިވެއެވެ.