މަކަރާއި ހީލަތުގެ މައްސަލަތަކުން ރައްކާތެރިކުރުމަށް މައުލޫމާތު ދިނުމުގެ ޕްރޮގްރާމެއް މަގޫދޫގައި ކުރިއަށް ގެންގޮސްފިއެވެ.

މި މަހު 20 އިން 24 އަށް މަގޫދޫ ޕޮލިސް ސްޓޭޝަނުން ކުރިއަށް ގެންދިޔަ އެ ޕްރޮގްރާމްގައި، ރަށުގެ އެކި މައިޒާންތަކާއި އާންމުކޮށް ރައްޔިތުން އެއްވާ ސަރަހައްދުތަކަކާއި ރަށުގެ ފިހާރަތަކާއި ހޮޓާ ރެސްޓޯރެންޓް ފަދަ ތަންތަނާ އަދި މުއައްސަސާތަކަށް ޒިޔާރަތްކޮށް މައުލޫމާތު ދީފައިވެއެެވެ.

އެގޮތުން، މަކަރާއި ހީލަތުން އޮޅުވާލައިގެން ފައިސާ ހޯދުމަށް ކުރަމުންދާ ކަންކަމުގެ މައުލޫމާތު ހިއްސާކޮށް އެފަދަ ކަންކަމުން ރައްޔިތުން ރައްކާތެރިވާނެގޮތުގެ މައުލޫމާތު ހިއްސާކޮށްފައިވެއެވެ. އަދި ބެންކު އެކައުންޓާއި ކޭޝްކާޑުގެ މައުލޫމާތު ހިއްސާނުކުރުމަށާ އަދި ފްލެޓާއި ހަދިޔާ ލިބިގެންކަމަށްބުނެ އެކި ނަންނަމުގައި ގުޅައި، ފޯނަށް އަންނަ ކޯޑު ނުވަތަ އެއްވެސް ޕާސްވޯޑު ދޭން އެދުނުކަމުގައި ވިޔަސް އެފަދަ އެއްވެސް މައުލޫމާތެއް ހިއްސާނުކުރުމަށާ އަދި އެކިފަރާތްތަކުން ފޮނުވާ މެއިލްތަކާއި ލިންކުތަކަށް ނުވަނުމަށް ނަސޭހަތްތެރިވެފައިވެއެވެ.

މީގެ އިތުރުން ވިޔަފާރިކުރުމަށްފަހު ފައިސާ ޓްރާންސްފަރކޮށް ފޮނުވާ ސްލިޕްތަށް ރަނގަޅަށް ބަލައި ފައިސާ ލިބުނުތޯ ޔަގީންކުރުމަށާއި ވިޔަފާރިތަކުގެ ސަލާމަތާއި ރައްކާތެރިކަމަށް ހާއްސަ ސަމާލުކަމެއް ދިނުމަށް މައުލޫމާތު ހިއްސާކޮށްފައިވެއެވެ. އަދި އެއްތަނުން އަނެއްތަނަށް ދަތުރު ކުރާއިރު މީހުންދޭ ގޮތްނޭނގޭ ތަކެތީގައި ނުހިފުމަށާއި އެކަމުން ރައްކާތެރިވެ ތިބުމަށް ކުރެވިދާނެ ކަންތަކުގެ މައުލޫމާތު ހިއްސާކުރުމުގެ އިތުރުން އަގުބޮޑެތި ތަކެތިި ގެންގުޅުމުގައި ވައްކަންކުރާ ފަރާތްތަކަށް ފުރުސަތުނުދީ ރައްކާތެރިކަމާއެކު އެތަކެތި ގެންގުޅުމަށް ބާރުއަޅައި މައުލޫމާތު ހިއްސާކޮށްފައިވެއެވެ.

އަދި އެއްގަމު ދަތުރުފަތުރު ކުރުމުގެ ގާނޫނާއި ގަވާއިދުތަކާ އެއްގޮތަށް އުޅަނދު ދުއްވުމަށް ނަސެހަތްތެރިވެފައިވެއެވެ.