އައްޑޫ ސިޓީ މަރަދޫ ސްކޫލުގެ ޕްރިފެކްޓް ދަރިވަރުންނާއި އެ ދަރިވަރުންގެ ބެލެނިވެރިންނަށް މައުލޫމާތު ދިނުމުގެ ސެޝަނެއް ގަން ޕޮލިސް ސްޓޭޝަނުން ކުރިއަށް ގެންގޮސްފިއެވެ.

އެގޮތުން، ދަރިވަރުންނަށް މައުލޫމާތު ދިނުމަށް ކުރިއަށް ގެންދިޔަ ސެޝަނުގައި، ގަނާކުރުމަކީ ކޮބައިކަން، ސްކޫލު މާހައުލުގައި ގަނާކުރުމުގެ ސަބަބުން ދިމާވާ މައްސަލަތައް އަދި އެފަދަ މައްސަލަތަކުން ދުރުހެލިވުމަށް ކުރެވިދާނެ ކަންކަމާ ގުޅެގޮތުން މައުލޫމާތު ހިއްސާކޮށްފައިވެއެވެ.

އޭގެ އިތުރުން، ރައްކާތެރި ގޮތުގައި އިންޓަނެޓް ބޭނުންކުރާނެގޮތާއި ސަމާލުކަންދޭންވީ ކަންކަން، އިންޓަނެޓް މެދުވެރިކޮށް ހިންގާ ކުށްތަކުން ސަލާމަތްވުމާއި އެއްވެސް މައްސަލައެއް ދިމާވެއްޖެނަމަ އެކަމެއް ސިއްރުނުކޮށް ބެލެނިވެރިންނާއި ހިއްސާކުރުމަށް މައުލޫމާތު ދީފައިވެއެވެ.

ޑިސެމްބަރ 10 ވަނަ ދުވަހު ގްރޫޕް މަސައްކަތާއެކު ކުރިއަށް ގެންދިޔަ ސެޝަނުގައި އެ ސްކޫލުގެ 32 ޕްރިފެކްޓުން ބައިވެރިވިއެވެ.

އެ ދަރިވަރުންގެ ބެލެނިވެރިންނަށް މައުލޫމާތު ދިނުމަށް ކުރިއަށް ގެންދިޔަ ސެޝަނުގައި، ދަރިވަރުން އިންޓަނެޓް ބޭނުންކުރާއިރު ބެލެނިވެރިން ސަމާލުކަންދޭންވީ ކަންކަން، އިންޓަނެޓް މެދުވެރިކޮށް ހިންގާ ކުށްތައް އަދި އެފަދަ ކުށްތަކުން ދަރިން ރައްކާތެރިކުރުމަށް ކުރެވިދާނެ ކަންކަމުގެ މައުލޫމާތު ހިއްސާކޮށްފައިވެއެވެ.

އަދި ދަރިން އިންޓަނެޓް ބޭނުންކުރާއިރު ބެލެނިވެރިން އެކަން މޮނީޓަރުކުރާނެ ގޮތުގެ މައުލޫމާތު ހިއްސާކޮށްފައިވެއެވެ. އަދި އެއްވެސް މައްސަލައެއް ދިމާވެއްޖެނަމަ ފުލުހުންނަށް މައްސަލަ ރިޕޯޓް ކުރުމަށް އިލްތިމާސްކޮށްފައިވެއެވެ.