ސައިބަރ ކްރައިމް ޑިޕާޓްމަންޓާއި ދ. އަތޮޅު ޕޮލިސް އަދި ކްރައިމް ޕްރިވެންޝަން އެންޑް ޕަބްލިކް އެފެއާޒް ގުޅިގެން، ދ. އަތޮޅުގެ މީހުން ދިރިއުޅޭ ހުރިހާ ރަށެއްގައި ސައިބަރ ސޭފްޓީ އެވެއާނަސް ސެޝަންތައް ކުރިއަށް ގެންގޮސްފައިވެއެވެ.

މި މަހު 12 އިން 16 އަށް ކުރިއަށް ގެންދިޔަ އެ ސެޝަންތަކުގައި ސްކޫލުތަކުގެ ދަރިވަރުންނަށާއި، ބެލެނިވެރިން އަދި މުއައްސަސާތަކުގެ މުވައްޒަފުންނަށް މައުލޫމާތުދީފައިވެއެވެ.

ސްކޫލު ދަރިވަރުންނަށް ކުރިއަށް ގެންދިޔަ ސެޝަންތަކުގައި ރައްކާތެރިގޮތުގައި އިންޓަނެޓް ބޭނުންކުރާނެ ގޮތްތަކާއި، އިންޓަނެޓް މެދުވެރިކޮށް ގޭމް ކުޅޭއިރު ސަމާލުކަންދޭންވީ ކަންތައްތަކާއި، ސޭފް ސެކިއުރިޓީ އަދި އެހެން ފަރާތްތަކާ ހިއްސާނުކުރެވޭނެ މައުލޫމާތުތައް ބުނެދީފައިވެއެވެ. އަދި އިންޓަނެޓް މެދުވެރިކޮށް ހިންގާ ކުށްތަކާއި އެފަދަ ކަމެއް ދިމާވެއްޖެނަމަ އެކަން ސިއްރުނުކޮށް ބެލެނިވެރިޔާއަށް ކިޔައިދިނުމަށް މައުލޫމާތު ދީފައިވެއެވެ.

މުއައްސަސާތަކުގެ މުވައްޒަފުންނަށާއި ބެލެނިވެރިންނަށް ކުރިއަށް ގެންދިޔަ ސެޝަނުގައި، ރައްކާތެރިގޮތުގައި އިންޓަނެޓް ބޭނުންކުރާނެ ގޮތްތަކާއި ކުދިންނާ ނުގުޅޭ ސައިޓުތައް ބްލޮކް ކުރާނެގޮތާއި އުމުރާ ނުގުޅޭ ގޭމުތަކުން ކުދިން ރައްކާތެރިކުރާނެ ގޮތްތަކުގެ މައުލޫމާތުދީފައިވެއެވެ. އަދި އިންޓަނެޓު މެދުވެރިކޮށް މަކަރާއި ހީލަތުން މައުލޫމާތު ހޯދިޔަ ނުދިނުމަށް މަސައްކަތްކުރާނެގޮތާ އަދި ފުރަތަމަ ފިޔަވަޅު މައުލޫގެ ދަށުން މައުލޫމާތު ހިއްސާކޮށްފައިވެއެވެ. އިންޓަނެޓް މެދުވެރުކޮށް ހިންގާ ކުށްތަކުން ކުދިން ރައްކާތެރިކުރުމަށް އެ ހުރިހާ ކަމަކަށް ވިސްނަންޖެހޭނެ ކަމަށާއި އަބަދުވެސް އެންމެ ރައްކާތެރިގޮތް ހިޔާރު ކުރުމަށް މައުލޫމާތު ދީފައިވެއެވެ.

އެ ސެޝަންތަކުގައި، ދ. އަތޮޅު ސްކޫލުތަކުގެ ގްރޭޑް 6 އިން ފެށިގެން މަތީގެ ހުރިހާ ދަރިވަރުންނާއި ހުރިހާ ސްކޫލް ހިމެނޭހެން 230 ބެލެނިވެރިންނާއި މުއައްސަސާތަކުގެ 51 މުވައްޒަފަންނަށް މައުލޫމާތުދީފައިވެއެވެ.