ކުށްމަދު އަމާން މުޖުތަމައެއް ގާއިމުކުރުމަށް ނ. ލަންދޫ ސްކޫލުގެ ދަރިވަރުންނާއި ބެލެނިވެރިން ހޭލުންތެރިކުރުވުމަށް މައުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފިއެވެ.

ނ. އަތޮޅު ޕޮލިހާއި، ކްރައިމް ޕްރިވެންޝަން އެންޑް ޕަބްލިކް އެފެއާޒާއި، އެންލައިޓެން އަ މައިންޑްފުލް ކޮމިއުނިޓީ އަދި ލަންދޫ ކައުންސިލު ގުޅިގެން އިއްޔެ ކުރިއަށް ގެންދިޔަ މި ސެޝަނުގައި މައުލޫމާތު ދީފައިވަނީ އެ ސްކޫލުގެ ގްރޭޑް 3 އިން މަތީގެ ދަރިވަރުންނަށެވެ. އެގޮތުން، ދިރިއުޅުމުގެ ހުނަރުތަކާއި އަމިއްލަ ނަފުސަށް ހޭލުންތެރިވާނެ ގޮތްތަކުގެ އިތުރުން ދިރިއުޅުމުގައި ދުޅަހެޔޮ ސއިްހަތެއްގެ މުހިންމުކަން ފަދަ މައުލޫމާތު ދަރިވަރުންނާ ހިއްސާކޮށްފައިވެއެވެ.

ބެލެނިވެރިންނަށް މައުލޫމާތު ދިނުމަށް ކުރިއަށް ގެންދިޔަ ސެޝަންގައި، ޒިންމާދާރު ހަރުދަނާ ބެލެނިވެރިއެއްގެ ކިބައިގައި ހުންނާނެ ސިފަތަކާ އަދި އުފާވެރި، ކާމިޔާބު ދަރިވަރުންތަކެއް ބިނާކުރުމުގެ މުހިންމުކަމުގެ މައްޗަށް އަލިއަޅުވާލައި މައުލޫމާތު ދީފައިވެއެވެ. އަދި މުޖުތަމައުގައި ހިނގާ ކުށްކުށާއި ކުށުގެ ބިރުވެރިކަން ކުޑަކުރުމަށް ބެލެނިވެރިންނަށް ކުރެވިދާނެ ކަންކަމާ ގުޅޭގޮތުން ވެސް މި ސެޝަންގައި މައުލޫމާތު ހިއްސާކޮށްފައިވެއެވެ.

ދަރިވަރުންނާއި ބެލެނިވެރިންނަށް ވަކިވަކިން ކުރިއަށް ގެންދިޔަ މި ސެޝަންތަކުގައި ލަންދޫ ސްކޫލުގެ ގްރޭޑް 3

 އިން މަތީގެ 135 ދަރިވަރުންނާއި 89 ބެލެނިވެރިން ބައިވެރިވިއެވެ.