ބައިނަލްއަގުވަމީ ކުޑަކުދިންގެ ދުވަސް ފާހަގަކުރުމަށް ދިވެހި ފުލުހުންގެ ޚިދުމަތާއި، ޔުނިސެފް މޯލްޑިވްސް ގުޅިގެން އުކުޅަހުގައި ކުރިއަށް ގެންދާ ހަރަކާތްތަކުގެ ތެރެއިން، ކުޑަކުދިންގެ ފަން ރަން ބާއްވައިފިއެވެ.

އިއްޔެ ހަވީރު އުކުޅަހު ބަނދަރު ސަރަހައްދުގައި ކުރިއަށް ގެންދިޔަ މި ހަރަކާތް ފެށުމުގެ ގޮތުން، ފަލަސްތީނުގައި ކުޑަކުދިންނަށް ދެމުން ގެންދާ ލާއިންސާނީ އަމަލުތައް ހުއްޓުމުގެ ގޮތުން އެއްމިނެޓްގެ ސްކޫތެއް ގެނެސްފައެވެ.

ފަން ރަން ފެށުމުގެ ގޮތުން ޒުންބާގެ ހާއްސަ ހަރަކާތްތައް ކުރިއަށް ގެންގޮސްފައިވެއެވެ. އުކުޅަހުގެ ގިނަ އަދަދެއްގެ ކުޑަކުދިން ބައިވެރިވި މި ފަން ރަންގައި ރޮބޯމޭންގެ ހަރަކާތްތަކެއް ވެސް ކުރިއަށް ގެންގޮސްފައިވެއެވެ.

ބައިނަލްއަގުވާމީ ކުޑަކުދިންގެ ދުވަސް ފާހަގަކުރުމަށް އުކުޅަސް އަދި އއ. އަތޮޅުގެ ހުރިހާ ރަށެއް ހިމެނޭހެން ގިނަ ހަރަކާތްތަކެއް ޑިސެމްބަރު 12 އިން 21 އަށް ކުރިއަށް ގެންދިއުމަށް ހަމަޖެހިފައިވެއެވެ. މި ހަރަކާތްތައް މިއަހަރު ކުރިއަށް ގެންދަނީ ދިވެހި ފުލުހުންގެ ޚިދުމަތާއި، ޔުނިސެފް މޯލްޑިވްސް، ޓައިނީ ހަރޓްސް، އުކުޅަހު ކައުންސިލް އަދި ރަށުގެ އެހެނިހެން މުއައްސަސާތަކާއި ޖަމުއިއްޔާތައް ގުޅިގެންނެވެ.